LEKGOTLAPEAMELAO LA PROFENSE YA GAUTENG
MOLAOKAKANYWA WA TLHOHLELETŠO YA KGWEBO, 2005
BJALO KA GE O TSEBAGADITŠWE KE MOLEKGOTLAPHETHIŠO YO A SWEREGO MAIKARABELO A MERERO YA TŠA EKONOMI
DITENG
KGAOLO 1 4
Ditlhalošo 4
KGAOLO 2 6
Tlhamo ya Tlhohleletšo ya Kgwebo ya Gauteng . Tiragatšo ya Molao wa Taolo ya Ditšhelete tša Setšhaba 6
Ditebanyo tša Tlhohleletšo ya Kgwebo ya Gauteng (GEP) 7
Maikarabelo a Tlhohleletšo ya Kgwebo ya Gauteng (GEP) 8
KGAOLO 3 10
LEKGOTLA LA TLHOHLELETŠO YA KGWEBO YA GAUTENG (GEP) 10
Molaotheo wa Lekgotla le thwalo ya maloko 10
Go se dumelelege ga thwalo goba boleloko……………………………… 11
Nako ya tšhomo ya maloko a Lekgotla 12
Maikarabelo a Lekgotla 13
Komitiphethišo 13
Dikomiti tša Lekgotla 14
Taelothomo ya mešomo wa Lekgotla 15
Thušo ya botsebi 16
Kgohlano ya dikgahlego tša maloko a Lekgotla 16
Dikopano tša Lekgotla 17
Tshwaro ya dikopano 17
Sephetho ntle le go swara kopano 18
KGAOLO 4 18
MOHLANKEDIMOGOLOPHETHIŠI 18
Thwalo ya Mohlankedimogolophethiši 18
Kgaolo Mohlankedimogolophethiši mošomong le go tšwa kantorong 20
Maikarabelo a Mohlankedimogolophethiši 22
Thwalo ya bašomi 22
Pegopepeneneng ya dikgahlego le kganetšano ya dikgahlego tša Mohlankedimogolophethiši 24
KGAOLO 5 24
LEANO, DITŠHELETE LE PEGO 24
Ngwaga wa ditšhelete 24
Ditšhelete tša Tlhohleletšo ya Kgwebo ya Gauteng GEP 25
Direkoto le ditatamente tša ditšhelete 27
Pego 28
KGAOLO 6 29
Tlhamo ya ditselatshepetšo 29
Melawana le phetogo ya Lenaneotshepetšo 29
Dihlongwa tšeo di kgethilwego 30
KGAOLO 7 32
DITLHALOŠO KA KAKARETŠO 32
Mapheko a go šomiša leina 32
Sephiri 32
Sehlogo se se kopana le tsenyotirišong 34
Lenaneotshepetšo 34
MOLAOKAKANYWA
Go kgontšha tlhamo, maikemišetšo le tšhomo ya Tlhohleletšo ya Kgwebo ya Gauteng; le go kgontšha merero yeo e sepelelanago le seo.
Lentšu la tlhalošo
A Maitekelo a thekgo ya dikgwebo tše nnyane ga se a ka a atlega ka koketšego yeo e bonagalago mo dikgwebong tšeo di swarelelago e bile di dira mašokotšo mme maitekelo ao ga se a ba le seabe seo se bonagalago go kgolo ya ka nageng ka kakaretšo, tekatekano le mešomo ka Gauteng.
B Mmušo wa Profense ya Gauteng o lemogile nyakego ya maanotshepetšo a thušo ya dikgwebo tše nnyane ao a tlago šoma go fetiša mananeo a ga bjale a mmušo le dihlongwa tša tša ditšhelete mme a tla fana ka thekgo ya tša ditšhelete le yeo e sego ya ditšhelete go dikgwebo tše nnyane tša Gauteng.
Ka gona o tla fetišwa ke Lekgotlapeamelao la Profense ya Gauteng ka mokgwa wo o latelago:-
KGAOLO 1
Ditlhalošo
Ka go Molao wo, ntle le ge tlhalošo e bontšha ka mokgwa wo mongwe—
Lekgotla" e ra Lekgotla la Tlhohleletšo ya Kgwebo ya Gauteng (GEP) leo le hlamilwego go ya ka karolo ya 7;
Mohlankedimogolophethiši" e ra Mohlankedimogolophethiši wa Lekgotla la Tlhohleletšo ya Kgwebo ya Gauteng (GEP) yo a thwetšwego go ya ka karolo ya 19;
Molaotheo" e ra molaotheo wa Repabliki ya Afrika Borwa, 1996;
Kgoro" e ra Kgoro yeo e nago le maikarabelo a merero ya tša ekonomi ka Profenseng;
Tlhohleletšo ya Kgwebo ya Gauteng (GEP)" e ra Tlhohleletšo ya Kgwebo ya Gauteng (GEP) yeo e hlamilwego go ya ka karolo ya 2;
Hlogo ya Kgoro" e ra Hlogo ya Kgoro yeo e nago le maikarabelo a merero ya tša ekonomi ka Profenseng;
Tlhalošo" e ra ka mo go hlalošwago ke molawana;
Profense" e ra profense ya Gauteng;
Molao wa Taolo ya tša Ditšhelete tša Setšhaba" e ra Molao wa Taolo ya tša Ditšhelete tsa Setšhaba, 1 of 1999;
Repabliki" e ra Repabliki ya Afrika Borwa;
Lenaneotshepetšo" e ra Lenaneotshepetšo la molao wo;
Moabi wa tirelo" e ra setho se fe goba se fe sa setšhaba goba sa poraebete seo se fanago ka tirelo ya thekgo go dikgwebo tše nnyane;
Dikgwebo tše nnyane" e ra sehlongwa sa kgwebo seo se lego thoko e bile se bonagala, go akaretšwa le dikgwebo tša mohlakanelwa (dikoporase) le mekgatlo yeo e sego ya mmušo, tšeo di laolwago ke motho o tee goba go feta tšeo, go akaretšwa makala le ditho tša ka tlase ga kgwebo, ge di le gona, di diragatšwago ka go karolo goba karolwana e fe goba e fe ya ekonomi yeo e hlalošwago ka go sehlopha sa 1 sa Lenaneotshepetšo mme e le gore e ka bewa la legorong la kgwebo ye -, e nyenyane kudu, ye nyenyane goba ya magareng ka go kgotsofatša, go ya ka lefapha leo le amegago, dinyakwa tšeo di hlalošwago ka go legoro la 3, 4 le 5 la Lenaneotshepetšo go lebana le bogolo bjo bo amegago bja legoro leo le hlalošwago ka go legoro la 2 la Lenaneotshepetšo; le molao wo" e akaretša Lenaneotshepetšo le melawana e fe goba e fe yeo e dirilwego go ya ka molao wo.
KGAOLO 2
TLHAMO YA TLHOHLELETŠO YA KGWEBO YA GAUTENG (GEP)
Tlhamo ya Tlhohleletšo ya Kgwebo ya Gauteng
Tlhamo ya Tlhohleletšo ya Kgwebo ya Gauteng GEP e hlangwa bjalo ka setho sa molao.
Tlhamo ya Tlhohleletšo ya Kgwebo ya Gauteng GEP e swanretše go diragatšwa ka Lekgotla.
Tiragatšo ya Molao wa Taolo ya Ditšhelete tša Setšhaba
Tlhamo ya Tlhohleletšo ya Kgwebo ya Gauteng GEP ke setho sa profense ya setšhaba bjalo ka ge se hlalošwa ka go karolo ya 1 ya Molao wa Taolo ya Ditšhelete tša Setšhaba le melawana ya wona yeo e amago ditho tša setšhaba sa profense.
Mo mabakeng a Molao wa Taolo ya Ditšhelete tša Setšhaba–
a Lekgotla ke bolaodi bja tša ditšhelete bjalo ka ge go hlalošwa ka go karolo y 492a ya Molao wa Taolo ya Ditšhelete tša Setšhaba;
b Molekgotlaphethiši ke Molekgotlaphethiši bjalo ka ge go hlalošwa ka go karolo ya 52 ya Molao wa Taolo ya Ditšhelete tša Setšhaba; le c Taelotšhomo e fe goba e fe ya mešomo ya Lekgotla go ya ka Molao wa Taolo ya Ditšhelete tša Setšhaba e swanetše go ya ka ditlhalošo tša karolo ya 56 ya Molao.
Ga go na tlhalošo ka go Molao wo yeo e nago le khuetšo ya go imolla Tlhohleletšo ya Kgwebo ya Gauteng GEP mo maikarabelong ao a beilwego magetleng a yona ke Molao wa Taolo ya Ditšhelete tša Setšhaba le melawana ya wona goba molaotlhakwa o fe goba o fe.
Ditebanyo tša Tlhohleletšo ya Kgwebo ya Gauteng (GEP)
Ditebanyo tša Tlhohleletšo ya Kgwebo ya Gauteng GEP ke go–
a Godiša le go tšweletša dikgwebo tše nnyane ka mono Gauteng;
b Diragatša molaotshepetšo wa Mmušo wa Profense ya Gauteng wa tšweletšo ya dikgwebo tše nnyane;
c Hlama le go diragatša mananeo a thekgo ya tšweletšo ya dikgwebo tše nnyane ka mono Gauteng;
d Hlama le go godiša dikgokagano tša thekgo go oketša seabe sa dikgwebo tše nnyane go ekonomi ya Gauteng;
e Hlohleletša kgolo ya ekonomi, tlholego ya mešomo le tekatekano;
f Kopantšha makalatiro ka moka a thekgo ya dikgwebo tše nnyane tšeo di thušwago ke mmušo ka ditšhelete ka mono Gauteng;
g Matlafatša bokgoni bja baabi ba ditirelo go thuša dikgwebo tše nnyane; le h Go maatlafatša bokgoni bja dikgwebo tše nnyane gore di phadišane ka katlego ka mono gae le ka go boditšhabatšhaba.
Ditsela tša motheo tšeo Tlhohleletšo ya Kgwebo ya Gauteng GEP e ka fihlelelago ditebanyo tša yona ke go –
a fana ka magato a thekgo yeo e sego ya ditšhelete go thuša bagwebi go akaretšwa, fela go sa felele go –
i go thuša ka leano la kgwebo;
ii ditirelo tša ditšhelete le tša molao;
iii tlhahlo ya khomphyutha le makgoni a mangwe;
iv tshedimošo le keletšo ka ga dithentara;
v phihlelelo ya tshedimošo ya mmušo le ditlhohleletšo;
vi keletšo ya thekontle le tšwetšontle;
vii keletšo ya tlhamotšweletšo; le viii thušo ya setswalle le bareki, thekišo le dinyakišišo b go fana ka magato a thekgo go thuša bagwebi go akaretšwa, fela go sa felele go –
i go ya ka karolo ya 6, go fana ka dinetefatšo;
ii thušo ya tša ditšhelete;
iii kgontšho ya sekoloto;
iv tefelomorago ya dikoloto; le v tlhohleletšo ya go tšwa ka pele dikolotong.
c Tshepetšo ya kabelo ya magato a thekgo a baabi ba ditirelo le batšeakarolo ba bangwe; le d Go fana ka thekgo ya go hwetša dithušo ka moka go bagwebi.
Maikarabelo a Tlhohleletšo ya Kgwebo ya Gauteng (GEP)
Gore e fihlelele ditebanyo tša yona, Tlhohleletšo ya Kgwebo ya Gauteng (GEP) e ka:
Thekga tšweletšo yeo e swarelelago, kabelo le kaonafatšo ya mafelo a keletšo a dikgwebo tše nnyane;
Hlama ditselahlahlo tša tšweletšo ya dikgwebo tše nnyane;
Tšea karolo ka go mediro ya Profense, boditšhabatšhaba go goka thekgo ya tšweletšo ya dikgwebo tše nnyane ka Profenseng;
Tšweletša maanotshepetšo le kgwebo ya mohlakanelwa le dipeakanyo tše dingwe tša mohlakanelwa le setšhaba le mekgatlo ye mengwe ka go Profense, Repabliking le dinageng tše dingwe;
Sepetša, go thekga le go kgokagana le mekgatlo le dihlongwa tšeo di lebišitšwego go godiša le go tšweletša dikgwebo tše nnyane ka go Profense le bosetšhaba;
Kopana le go tšea karolo ka go mekgatlo ya tšweletšo ya dikgwebo tše nnyane le thekišo;
Fana ka thušo ya tšhelete go porotšeke e fe goba e fe go tšweletša dikgwebo tše nnyane ka go Profense;
Hlama le go diragatša thekgo ya mananeo a tšweletšo ya dikgwebo tše nnyane go kgontšha —
a kago ya dikgwebo tšeo di swarelelago tša phadišano;
b kgodišo ya bogwebi;
c tlhamo ya tikologo yeo e kgontšhago tiragatšo ya dikgwebo tše nnyane;
d phihlelelo ya dikgwebo tše nnyane go methopo ya ditšhelete le yeo e sego ya ditšhelete, ditirelo tša kago ya bokgoni, ditšweletšwa le ditirelo; le e phihlelelo ya mebaraka ya boditšhabatšhaba le bosetšhaba ya ditšweletšwa le ditirelo tša dikgwebo tše nnyane.
Tšweletša, le go sepetša le go bofagantšha mehlakanelwa mo tshepetšong ya mmušo, lefapha la poraebete le batšeakarolo bao ba amegago bao ba ka go thuša Tlhohleletšo ya Kgwebo ya Gauteng GEP go fihlelela ditebanyo tša yona;
Godiša kgokagano ya kabelo ya ditirelo go tlabela phihlelelo ya thekgo ya tšweletšo ya dikgwebo tše nnyane.
Tlabela le go le go sepetša dinyakišišo mabapi le mananeo a thekgo ya dikgwebo tše nnyane;
Fana ka keletšo, tshedimošo, tshekaseko le thekgo ka go tiragatšo ya molaotshepetšo wa tšweletšo ya dikgwebo tše nnyane ka mono Profenseng;
Ka kgopelo ya Molekgotlaphethiši, e ka nyakišiša, ya swaetša le go eletša godimo ga molaotlhakwa wo o lego gona wo o šišintšwego ka ga dikgwebo tše nnyane le go bega ka seo go Molekgotlaphethiši;
Kaonafatša kwešišo ya setšhaba mabapi le seabe sa dikgwebo tše nnyane go kgolo ya ekonomi ya ka mono nageng, tlholego ya mešomo le leago ka kakaretšo;
Hlama ditho ka go retšene le selegae go diragatša ditebanyo ka tshwanelo; le
Go diragatša molao o fe goba o fe wo mongwe le ge o sa sepelelane le Molao wo.
Ga go netefatšo yeo e fiwago go ya ka Molao wo ntle le ge o ntšhiwa ke Molekgotlaphethiši go ya ka dinyakwa tša karolo ya 66 (d) tša Molao wa Taolo ya Ditšhelete tša Setšhaba.
KAROLO YA 3
LEKGOTLA LA TLHOHLELETŠO YA KGWEBO YA GAUTENG (GEP)
Molaotheo wa Lekgotla le thwalo ya maloko
Molekgotlaphethiši o swanetše go hwetša maloko Lekgotla mme a se thwale maloko a ka tlase ga a mane le ka godimo ga a lesomepedi.
Pele a thwala maloko a Lekgotla, Molekgotlaphethiši o swanetše go mema, ka go šomiša baditaba le ka tsebišo ka go Kasete ya Profense, kgetho ya bao ba nago le kgahlego ya go thwalwa.
Molekgotlaphethiši o swanetše go netefatša gore Lekgotla le –
a emela karolo ye kgolwane ya setšhaba sa Gauteng a etše hloko yeo e ikgethago ya morafe, bong, bogole, boikalo bja naga le mekgatlo yeo e lego dinagamagaeng;
b na le maloko ao a nago le maitemogelo ka go kgwebo;
c na le maloko ao go ya ka tlhahlo le maitemogelo a bona, a na le tsebo ka ga -
i kgwebišano, intaseteri, ditšhelete goba ekonomi;
ii legoratšhomo la semolao leo le amago dikgwebo tše nnyane; le iii taolo ya dikgwebo tše nnyane.
Molekgotlaphethiši a ka hwetša mekgwa ye mengwe e fe goba e fe goba tshepetšo go thwala maloko.
Mohlankedimogolophethiši ke leloko la Lekgotla ka lebaka la kantoro yeo a e dutšego.
Maloko a Lekgotla ka moka, ntle le Mohlankedimogolophethiši, a thwalwa ga nakwana.
a leloko la Lekgotla bjalo ka modulasetulo; le b leloko le lengwe bjalo ka mothušamodulasetulo, go šoma bjalo ka modulasetulo wa Lekgotla modulasetulo a sa kgone go diragatša mošomo woo.
Go sa ganetšwe selo seo se lego kgahlanong ka go molao wo, Molekgotlaphethiši a ka re mo mabakeng a selebišwa sa maleba, a se ye ka ditlhalošo tše dingwe tša karolo ye.
Go se dumelelege ga thwalo le boleloko
Motho ka se thwalwe bjalo ka leloko la Lekgotla ge e le gore motho yoo –
a ga se modudi wa Repabliki, le go ba modudi wa ka Profenseng;
b ke leloko la Palamente, Lekgotlapeamelao wa Profense, Khansele ya Mmasepala goba Ntlo ya Dingaka tša Setšo yeo e hlamilwego go ya Molaotheo;
c letseno le dithoto tša gagwe di jelwe ka lebaka la dikoloto mo e lego gore a ka se sa kgona go iteka;
d ga a felela monaganong, goba kgorotsheko e ntšhitše taelo ya gore motho yoo o bajwa ka monaganong goba ga a felela ka tshwanelo;
e o kile a golegwa ka molato wo o amago go hloka botshepegi;
f o kile a tlošwa mošomong wa botshepegi ka lebaka la maitshwaromabe; le gore g o kile a tlošwa ka go Lekgotla ka go tlola ditlhalošo di fe goba di fe tša Molao wo.
Leloko la Lekgotla le swanetše go tlogela mošomo ge e le gore o angwa ke mabaka ao a sa dumelelegego ao a hlalošwago ka go karolwana ya 1.
Molekgotlaphethiši a ka emiša thwalo ya leloko ge a –
a itshwara gampe, a sa šome goba a se na bokgoni;
b retelelwa ke go obamela karolo ya 82 goba 151;
c leloko le palelwa ke go ba gona dikopanong tše tharo tšeo di latelanago tša Lekgotla ntle le tlhalošo yeo e kwagalago; goba d ka lebaka leo le bontšhwago la mohola.
Ge e le gore tiragatšo ya Lekgotla ga e kgotsofatše goba ga e na mohola, Molekgotlaphethiši, ka morago ga go fa Lekgotla sekgoba sa go theeletšwa, a ka šwalalanya Lekgotla .
Lebaka la tšhomo ya maloko a Lekgotla
Leloko la Lekgotla le ka –
a ba kantorong lebaka la mengwaga ye meraro;
b šoma go ya ka mabaka ao a beilwego ke Molekgotlaphethiši mme a hlalošitšwe ka go lengwalo la thwalo la leloko; mme c le ka leboga mošomo ka go fa tsebišo ya dikgwedi tše tharo ka go ngwala go Molekgotlaphethiši goba tsebišo yeo bjalo ka ge go bontšhwa ka go lengwalo la thwalo.
Ge thwalo ya leloko e fedišwa goba leloko le leboga mošomo, Molekgotlaphethiši a ka thwala motho go tlatša sekgoba mo lebakeng leo le sego la feleleletšwa leo leloko le bego le thwaletšwe lona, goba mo lebakeng leo Molekgotlaphethiši a ka le beago go ya ka ditlhalošo tša karolwana 3.
Go ya ka karolo ya 8, motho o fe goba o fe yo nako ya gagwe ya go dula kantorong bjalo ka laloko e fela, a ka thwalwa gape ge e le gore leloko leo le ka se dule kantorong go feta makga a mabedi.
Molekgotlaphethiši o swanetše go laola meputso le dialawense tša maloko a Lekgotla.
Mohlankedimogolophethiši le leloko le fe goba le fe mo bošomeding bja Mmušo ga ba a swanela go hwetša moputso wo mongwe wa tlaleletšo go alawense ya go šoma ka go Lekgotla, fela ba la lefelwa ditshenyegelo tšeo ba di hwetšago ge ba diragatša mešomo go ya ka Molao wo.
Maikarabelo a Lekgotla
Lekgotla le swanetše go –
a netefatša gore mešomo ya Tlhohleletšo ya Kgwebo ya Gauteng GEP e a diragatšwa le gore ditebanyo tša Tlhohleletšo ya Kgwebo ya Gauteng GEP di a fihlelelwa;
b diragatša mešomo ya bookamedi le maikarabelo a bolaodi bja tša ditšhelete go ya ka Molao wa Taolo ya Ditšhelete tša Setšhaba go ya ka Tlhohleletšo ya Kgwebo ya Gauteng GEP; le c šoma ka mokgwa wo o lego pepeneneg.
Molekgotlaphethiši a ka fa Lekgotla ditaelotshepetšo tšeo di sa sepelelanego le Molao wo.
Lekgotla le swanetše go dira ka mo go lebanego goba go šomegago go diragatša mešomo ya lona go akaretšwa le –
a tlhamo, go sepediša le go šireletša ditshepetšo tšeo di amago setšhaba mo mererong yeo e amago mešomo yeo;
b go hwetša le go tšea tokelo ka go thoto, ge e le gore thoto yeo e sa šuthego e ka tšeelwa goba ya tlošwa ka tokelo ya Molekgotlaphethiši fela;
c go diragatša mediro ya semolao, go akaretšwa mediro le motho o fe goba o fe goba setho sa mmušo; le d go tsenela dikwano tša mabapi le thekgo ya tša ditšhelete le dihlongwa tša tša ditšhelete goba sehlongwa se fe goba se fe seo se nago le ditebanyo tša go swana le tša Tlhohleletšo ya Kgwebo ya Gauteng GEP.
Lekgotla le ka thwala komitiphethiši yeo e nago le –
a Maloko a mabedi goba go feta; le b Mohlankedimogolophethiši, yo e lego leloko leo le sa boutego la komitiphethiši.
a e na le maatla a go diragatša mediro ka moka ya Lekgotla mo lebakeng la magareng ga dikopano tša Lekgotla; mme b ga e na maatla a go phaela thoko goba go fetola diphetho tša Lekgotla .
Sephetho sa komitiphethiši se ka beelwa thoko goba sa fetolwa ke Lekgotla ka go kopano yeo e latelago, go ya ka tokelo e fe goba e fe yeo e ka bego e tlotšwe ka lebaka la sephetho.
Dikomiti tša Lekgotla
Lekgotla le ka hlama komiti e tee goba go feta go šomana le goba go nyakišiša ka ga morero o fe goba o fe wo Lekgotla le o fetetšago go tšona le go tliša pego ka ga merero yeo go Lekgotla.
Komiti e swanetše go ba le leloko la Lekgotla le tee goba go feta mme, ge Lekgotla le ka tšea sephetho seo, le batho ba bangwe bao ba nago le maswanedi a go ba maloko a Lekgotla.
Ge komiti e na le leloko le tee goba go feta, Lekgotla le swanetše go bea leloko la Lekgotla leo le lego ka go komiti bjalo ka modulasetulo.
Lekgotla le ka re nako le nako la šwalalanya goba la agaleswa komiti.
Leloko la komiti leo e sego leloko la Lekgotla goba leo le šomelago Mmušo ka dinako ka moka le swanetše go hwetša moputso le dialawense go tšwa go ditšhelete tša Lekgotla bjalo ka ge Lekgotla, ka morago ga go ikopanya le Molekgotlaphethiši, le ka beago ka gona .
Taelotšhomo ya mešomo ya Lekgotla
Lekgotla le ka, go ya ka ditlhalošo tša karolo ye, laela maikarabelo, mešomo le mediro go –
a Leloko le fe goba le fe la Lekgotla goba go komiti e fe goba e fe ya Lekgotla; goba b Mohlankedimogolophethiši.
Taelotšhomo ka tlase ga karolwana ya 1 e swanetše go ba yeo e ngwetšwego mme a E ka ba go ya ka mabaka goba mapheko ao a bewago ke Lekgotla;
b Ga e thibele go diragatša mešomo yeo ke Lekgotla; mme c E ka gogelwa morago goba ya fetolwa ke Lekgotla.
Se sengwe le se sengwe seo se dirwago go phethagatša maikarabelo, mošomo goba modiro wo o laetšwego ke Lekgotla , se tšewa gore se dirilwe ke Lekgotla.
Thušo ya botsebi
Lekgotla le ka hwetša thušo ya batho bao ba nago le bokgoni bja maleba go thuša go phethagatša mešomo ya lona.
Lekgotla le swanetše go –
a bea mabaka, mekgwa, meputso le dialawense tšeo di amago motho yo a thwetšwego ka tlase ga karolwana ya 1, le mošomo wo o swanetšego go phethagatšwa goba tirelo yeo e swanetšego go fiwa ke bona; le b go phethagatša dikwano tšeo di ngwetšwego tšeo di nago le merero yeo e beilwego ka go temana ya a.
Ge a phethagaditše mošomo goba a feditše tirelo go ya ka kwano yeo e hlalošwago ka go karolwana ya 2b, motho yoo o swanetše go hlagiša pego go Lekgotla gore e senkwe.
Lekgotla, morago ga go senka pego yeo e hlalošwago ka go karolwana ya 3, le ka bušetša morero morago go motho yoo go fiwa šedi gape bjalo ka ge Lekgotla le ka laola.
Kganetšano ya dikgahlego ya maloko a Lekgotla
Maloko a Lekgotla –
a a swanetše go bea pepeneneng dikganetšano tša dikgahlego go akaretša le yeo e sa tlago;
b ga a swanela go bouta, go tšea karolo ka go ditshepetšo di fe goba di fe tša Lekgotla mabapi le morero o fe goba o fe pele ga Lekgotla yeo ka go yona go nago le kganetšano ya dikgahlego; mme c ba swanetše go obamela diphetho tša Lekgotla gore ba a dumelelwa naa go tšea karolo ka go tshepetšo e fe goba e fe ye e itšeng ya Lekgotla.
Mo mabakeng a karolo ye, leloko le na le kganetšano ya dikgahlego ge –
a leloko, goba leloko la lapa, mošomammogo goba molekani wa kgwebo wa leloko a dira kgopelo ya, goba a na le dikgahlego tša ditšhelete goba dikgahlego tše dingwe ka go kgwebo yeo e kgopelago thušo go Tlhohleletšo ya Kgwebo ya Gauteng GEP goba ba dirile dihlagišo mabapi le kgopelo yeo e lego ka tlase ga tshenko; goba b leloko le na le kgahlego efe goba efe yeo e ka thibelago, goba yeo e ka bonwago ka kgonthišo gore e thibela leloko go diragatša mošomo wa leloko la Lekgotla ka mokgwa wo o swanetšego, o sa tšeego lehlakore le ka mokgwa wa maleba.
Pegopepeneneng go ya ka karolwana ya 1a le sephetho se fe goba se fe sa Lekgotla go ya ka karolwana ya 1c, e swanetše go ngwalwa ka gare ga metsotso ya Lekgotla .
Dikopano tša Lekgotla
Lekgotla le swanetše go swara bonnyane dikopano tše nne ka ngwaga.
Modulasetulo –
a A ka bitša kopano yeo e ikgethago ya Lekgotla; gape b A ka bitša kopano yeo e ikgethago mo matšatšing a 14 a go amogela kgopelo yeo e ngwetšwego go dira seo, yeo e saenilwego ke bonnyane tee tharong ya maloko a Lekgotla.
Kgopelo yeo e hlalošwago ka go karolwana ya 2b e swanetše go hlaloša ka kwešišagalo mabaka a kgopelo mme ke merero yeo fela yeo e tlago ahlaahlwa mo kopanong yeo e sego ya mehleng.
Molekgotlaphethiši a ka kgopela kopano le Lekgotla nakong e fe goba e fe, ge go ka hlokagala.
Ge modulasetulo le mothušamodulasetulo ba se gona, maloko ao a lego gona ba swanetše go kgetha leloko le lengwe go dula setulo mo kopanong.
Mo kopanong, bontši bja maloko bo dira khoramo.
Sephetho sa bontši bja maloko ao a lego gona mo kopanong e fe goba e fe yeo e dirwago ke khoramo e tla ba sephetho sa Lekgotla mme mo mabakeng a diboutu tšeo di lekanago, modulasetulo o tla dira boutu ye nngwe godimo ga ya mang le mang.
Sephetho seo se tšewago ke bontši bja maloko a Lekgotla ao a lego gona kopanong ya khoramo, goba tiragatšo yeo e dirwago go ya ka sephetho seo, ga se hlokomologwe ka lebaka fela la–
a Tshepetšompe ya thwalo ya leloko;
b Sekgoba ka go Lekgotla;
c Lebaka la gore motho yo mongwe yo e sego leloko o tšere karolo ka go kopano nakong ya ge sephetho se tšewa; goba d Lebaka la gore leloko le tšere karolo ka go kopano ka go tshela karolo ya 151.
Tshwaro ya dikopano
Lekgotla le ka bea melao ya mekgwatshepetšo ya go sepetša ditaba tša lona ka go dikopano.
Metsotso ya mekgwatshepetšo ya kopano ye nngwe le ye nngwe ya Lekgotla e swanetše go –
a ngwalwa mme ya lotwa ka mokgwa wa go ya go ile; le b go išwa ka go kopano yeo e latelago ya Lekgotla gore e hlahlobje, mme, ge e dumelelega, e swanetše go saenwa ke modulasetulo.
Lekgotla la ka –
a Dumelela maloko go tšea karolo ka go kopano ka go šomiša mogala, telebišene ya sekete yeo e tswalegilego goba ka mokgwa o fe goba o fe wa dikgokagano, mme leloko leo le tšeago karolo ka mokgwa wo, le tšewa bjalo ka ge le le gona mo kopanong; mme le ka b Mema motho go ba gona kopanong mo mabakeng a go eletša goba go sedimoša Lekgotla ka ga morero o fe goba o fe.
Sephetho ntle le go swara kopano
Lekgotla le ka fetiša sephetho ntle le kopano ge e le gore bontši bja maloko ba bontšha thekgo ya bona ya sephetho go ya ka mekgwatshepetšo yeo e hlamilwego ke Lekgotla.
Sephetho go ya ka karolwana ya 1 –
a se na le maemo ao a swanago bjalo ka ge se fetišitšwe ka go kopano; mme b se swanetše go tšewa bjalo ka ge se tšerwe mo letšatšing leo le beilwego go ya ka mekgwatshepetšo yeo e hlalošwago ka go karolwana ya 1.
KAROLO YA 4
MOHLANKEDIMOGOLOPHETHIŠI
Thwalo ya Mohlankedimogolophethiši
Molekgotlaphethiši, morago ga go ikopanya le Lekgotla , o swanetše go thwala Mohlankedimogolophethiši.
Mohlankedimogolophethiši o swanetše go ba –
a Motho wa maswanedi yo a lebanego mme a na le tsebo, mangwalo le maitemogelo ka go tšweletšo le kgodišo ya kgwebo ye nnyane; mme b E be modudi wa Repabliki ya Afrika Borwa ka go Profense.
Mohlankedimogolophethiši o šoma -
a lebaka leo le sa fetego mengwaga ye meraro mme a ka thwalwa gape; le b la mabaka le maemo ao Molekgotlaphethiši, morago ga go ikopanya le Lekgotla, ba ka bonago ka gona.
Mohlankedimogolophethiši ga a swanela go tšea karolo ka go mošomo wo mongwe wo o lefelago ka ntle ga mešomo ya kantoro ntle le tumelelo ya Lekgotla.
Mohlankedimogolophethiši a ka leboga mošomo ka go fa tsebišo ka go ngwalela Molekgotlaphethiši.
Ge a emiša ka go šoma ka kantorong, ka lebaka le fe goba le fe, Mohlankedimogolophethiši o emiša go ba leloko la Lekgotla goba setho se fe goba se fe seo ka sona a bego a emela Tlhohleletšo ya Kgwebo ya Gauteng GEP.
Kwanomabaka a mošomo le kwano ya tiragatšo
Molekgotlaphethiši le Mohlankedimogolophethiši ba swanetše go dira kwanomabaka yeo e ngwetšwego ya mošomo ya Mohlankedimogolophethiši yeo e swanetšego go ba le foromo ya maleba yeo ka go yona go akaretšwago karolo ya 57 ya Molao wa Taolo ya Ditšhelete tša Setšhaba.
Lekgotla le Mohlankedimogolophethiši ba swanetše go dira kwano ya tiragatšo ya Mohlankedimogolophethiši–
a mo nakong yeo e amogelegago morago ga thwalo ya Mohlankedimogolophethiši; mme b morago ga fao, ngwaga ka ngwaga mo kgweding ye tee ya mathomo a ngwaga wa ditšhelete.
Kwano ya tiragatšo e swanetše go akaretša –
a Ditebanyo tšeo di kgonegago go lekantšhwa tša tiragatšo le diphihlelelo tšeo di swanetšego go fihlelelwa, le dinako tšeo ka gare go tšona ditebanyo le diphihlelelo tšeo tša tiragatšo di swanetšego go fihlelelwa;
b Maemo le mekgwatshepetšo ya go hlahloba tiragatšo le dinakomagareng ga hlahlobo; le c Ditlamorago tša tiragatšo yeo e lego ka tlase ga maemo.
Kgaolo Mohlankedimogolophethiši mošomong le go tšwa kantorong
Ga go motho yo a ka thwalwago bjalo ka Mohlankedimogolophethiši ge e le gore motho yoo o kgaotšwe goba leloko la Lekgotla go ya ka karolo ya 81.
Mohlankedimogolophethiši o swanetše go tšwa kantorong ge fela a kgaolwa go ya ka karolo ya 8 1.
Molekgotlaphethiši, morago ga go fa Mohlankedimogolophethiši sebaka sa go theeletšwa le ka morago ga go ikopanya le Lekgotla, a ka emiša thwalo ya Mohlankedimogolophethiši ge, go ya ka kgopolo Molekgotlaphethiši, go na le mabaka ao a kgotsofatsago go dira seo.
Maikarabelo a Mohlankedimogolophethiši
Mohlankedimogolophethiši ke –
a Mošomi wa Tlhohleletšo ya Kgwebo ya Gauteng GEP;
b Yo a nago le maikarabelo a laola Tlhohleletšo ya Kgwebo ya Gauteng GEP; letšatši ka letšatši; le c Go bega ka go Lekgotla.
Mohlankedimogolophethiši a ka, go ya ka karolo ya 103c dira dilo ka moka tšeo di swanetšego goba tšeo di potlakišago tiragatšo ya gagwe ya mošomo go ya ka molao wo, go akaretšwa fela go sa felele go -
a go tsenela mabakakwano; le b go swara dikopano tša kgokagano batšeakarolo, baabelwa le baemedi ba profense go ahlaahla mediro le tiragatšo ya Tlhohleletšo ya Kgwebo ya Gauteng GEP bonnyane ga tee mo ngwageng.
Thwalo ya bašomi
Mohlankedimogolophethiši, ka kwano le Lekgotla–
a A ka thwala bašomi bao ba nago le botsebi bja maleba go Tlhohleletšo ya Kgwebo ya Gauteng GEP go diragatša mešomo ya yona; le b Go beakanya le mmušo wa bosetšhaba le wa profense goba setho se fe goba se fe go ditirelo tša–
i bašomi ba mmušo wa bosetšhaba le ba profense go ba setho se sengwe go ka fetetšwa ka go Tlhohleletšo ya Kgwebo ya Gauteng GEP; goba ii bašomi ba Tlhohleletšo ya Kgwebo ya Gauteng GEP go ka fetetšwa ka go mmušo wa bosetšhaba le wa profense.
Batho bao ba fetišeditšwego ka go Tlhohleletšo ya Kgwebo ya Gauteng GEP ba dira mošomo go ya ka taolo le tselatshepetšo ya Mohlankedimogolophethiši.
Lekgotla ka go ikgokaganya le Molekgotlaphethiši, o swanetše go bea moputso, dialawense, dipoelo, le mabakatšomo a mangwe a thwalo ya maloko a bašomi.
Tlhohleletšo ya Kgwebo ya Gauteng GEP e ka tsenele kontraka tša ditirelo tša batho, bašomi ba bangwe, go ka diragatša mešomo ye itšeng.
Mohlankedimogolophethiši a ka laela tšhomo ya maikarabelo goba tiragatšo ya mošomo o fe wo o filwego Mohlankedimogolophethiši ke goba ka tlase ga Molao wo goba wo Mohlankedimogolophethiši a o laetšwego ke Lekgotla –
a motho o fe goba o fe yo a nago le tsebo le maitemogelo, yo a lego ka tlase ga taolo ya Mohlankedimogolophethiši; goba b motho o fe goba o fe, morago ga go ikopantšha le Lekgotla.
Thomotšhomo ka tlase ga karolwana 1 e swanetše go ba yeo e ngwetšwego mme –
a e sepetšwa go ya ka mabaka goba mapheko ao a bewago ke Mohlankedimogolophethiši;
b e sa thibele tiragatšo ya mošomo woo ke Mohlankedimogolophethiši; mme c e ka nna ya gogelwa morago goba ya fetolwa ke Mohlankedimogolophethiši.
Kutullo ya dikgahlego le kganano ya dikgahlego ka Mohlankedimogolophethiši
Mohlankedimogolophethiši o swanetše go utollela Lekgotla thwi goba ka tsela ye nngwe, go akaretšwa le dikgahlego tšeo a ikwago gore o na le tšona, tšeo ka go tšona yena goba leloko la kgauswi la lapa, molekane wa gago wa kgwebo, mošomammogo goba mongmošomo wa gago wa lebaka leo le fetilego ba nago le yona ka go kgwebo e fe goba e fe yeo e ka holegago go tšwa go mešomo ya Tlhohleletšo ya Kgwebo ya Gauteng GEP.
Mohlankedimogolophethiši o swanetše go feteša ka go Lekgotla morero o fe goba o fe wo e lego gore sephetho mabapi le wona se swanetše go tšewa ke Molekgotlaphethiši goba a tšee magato mo go nago le kgananao ya dikgahlego goba kganano yeo e sa tlo diregago bjalo ka ge go hlalošitšwe ka go karolwana ya 1
Lekgotla le swanetše go hwetša sephetho sa maleba goba tiragatšo mabapi le morero o fe goba o fe wo o feteditšwego go wona go ya ka karolwana ya 2, mme le swanetše go tsebiša Mohlankedimogolophethiši ka ga phedišo ka go ngwala.
Mohlankedimogolophethiši o swanetše go obamela dikakanyo tša Lekgotla tšeo di hlalošwago ka go karolwana ya 3.
Thetelelo ya Mohlankedimogolophethiši go utolla kgahlego e fe goba e fe yeo e hlalošwago ka go karolwana ya 1 goba tlolo ya karolwana 2 goba 4, e hlola lebaka leo le tiilego go kgaola mošomo wa Mohlankedimogolophethiši go ya ka karolo ya 213.
KGAOLO 5
PEAKANYO, DITŠHELETE LE PEGO
Ngwaga wa ditšhelete
Ngwaga wa ditšhelete wa Tlhohleletšo ya Kgwebo ya Gauteng (GEP) o thoma ka la 1 Aprele gomme o felela ka la 31 Matšhe ngwageng wo o latelago.
Ditšhelete tša Tlhohleletšo ya Kgwebo ya Gauteng (GEP)
Ditšhelete tša Tlhohleletšo ya Kgwebo ya Gauteng GEP di dirwa ke a ditšhelete tšeo di tsentšwego ke Lekgotlapeamelao la Tlhohleletšo ya Kgwebo ya Gauteng GEP;
b ditšhelete tšeo di dirwago ke Tlhohleletšo ya Kgwebo ya Gauteng GEP go tšwa go mothopo o fe goba o fe wo o dumeletšwego ke Molekgotlaphethiši, go akaretšwa tšhelete yeo e lefelwago go ya ka Molao wo; le c ditshelete tšeo di hweditšwego ke Tlhohleletšo ya Kgwebo ya Gauteng GEP go ya ka molao, go tswa mothopong o fe goba o fe.
Tlhohleletšo ya Kgwebo ya Gauteng GEPe swanetše, mabakeng a tsenyo yeo e hlalošwago ka go karolwana 1a, bonnyane dikgwedi tše tshela pele ga mathomo a ngwaga wa ditšhelete, go hlagiša tekanyetšo ya tšhelete go Molekgotlaphethiši wa tekanyetšo ya tšhelete yeo e lego ka mokotleng le ditshenyegelo tša ngwaga woo wa ditšhelete.
Tlhohleletšo ya Kgwebo ya Gauteng GEP e swanetše go bula akhaonto le panka yeo e ngwadišitšwego ka mono Repabliki mme e dumeletšwe ka go ngwalwa ke Bamatlotlo ba Profense morago ga go obamela ditselatshepetšo tšeo di beilwego tša thentara, mme e swanetše go tsenya ka go akhaonto yeo tšhelete ka moka yeo e hlalošwago ka go karolwana ya 1.
Tlhohleletšo ya Kgwebo ya Gauteng GEP e ka beeletša tšhelete e fe goba e fe ya yona yeo e ka se šomišwego ka pele –
a go ya ka molaotshepetšo o fe goba o fe wa peeletšo wo o ka beago go ya ka karolo ya 74 ya Molao wa Taolo ta Tšhelete ya Setšahba; le b ka mokgwa wo o ka dumelelwago ke Molekgotlaphethiši.
Ntle le ge tumelelo ya pele ya Bamatlotlo ba Profense e hweditšwe, Tlhohleletšo ya Kgwebo ya Gauteng GEP e ka nna ya se lekanyetše tlhaelo goba ya kgoboketša ditšhadišwa.
Ge ngwaga wa ditšhelete o tswalelwa, mašaledi a letseno morago ga ditshenyegelo, e ka ba ka go akhaonto yeo e hlalošwago ka go karolwana ya 3 goba yeo e beeleditšwego ka tlase ga karolwana ya 4, e swanetše go lefelwa ka go Tšhelete ya Matlotlo a Profense.
Tlhohleletšo ya Kgwebo ya Gauteng GEP e ka hwetša dikadimo tša nako ye kopana go fihlela go tšhelete yeo e ka dumelelwago ke Molekgotlaphethiši nako le nako ka mokgwa wa go ntšha tšhelete yeo e feteletšego ka akhontong ya panka bjalo ka ge go laetšwa ka go karolwana ya 3 goba go ka thiba ditlhaelo tšeo di ka hlagago.
Leano la maanotshepetšo
Ngwaga ka ngwaga Tlhohleletšo ya Kgwebo ya Gauteng GEP e swanetše go beakanya mme ya iša go Molekgotlaphethiši leano la maanotshepetšo la taolotshepetšo ya yona leo le akaretšago ngwaga wa ditšhelete wo o latelago le mengwaga ye mebedi ya ditšhelete yeo e latelago morago ga moo, goba lebaka le fe goba le fe leo le beilwego ka tlase ga Molao wa Taolo ya Ditšhelete tša Setšhaba.
Leano la maanotshepetšo le swanetše go sepelelana le dinyakwa tšeo di beilwego ka tlase ga Molao wa Taolo ya Ditšhelete tša Setšhaba mme le swanetše go akaretša –
a ditlapele tša Tlhohleletšo ya Kgwebo ya Gauteng GEP tša ngwaga wa ditšhelete wo o amegago;
b ditebanyo le dipoelo tšeo di hlalošwago ke Molekgotlaphethiši;
c diponelopele tša letseno le tshenyegelo ya mengwaga ye mentši;
d magato a motheo a tiragatšo le ditšhupo tša tlhahlobo ya tiragatšo ya Tlhohleletšo ya Kgwebo ya Gauteng GEP ya dipoelo le ditebanyo;
e leano la tšhomo, leano la ditšhelete, tšomo ya batho le leano la taolo ya tiragatšo; le f motheo wa pego ya ngwaga ka ngwaga yeo e beakantšwego go ya ka karolo ya 302.
Molekgotlaphethiši a ka kgopela gore tshedimošo ya koketšo e tsenywe ka go leano la maanotshepetšo.
Direkoto le ditatamente tša ditšhelete
Ntle le go fokotša maikarabelo a yona go ya ka Molao wa Taolo ya Ditšhelete tša Setšhaba, Tlhohleletšo ya Kgwebo ya Gauteng GEP e swanetše go –
a swara direkoto tša maleba ka botlalo tša merero ya yona ya ditšhelete ka moka:
b beakanya ditatamente tša ditšhelete tša ngwaga wo mongwe le wo mongwe go ya ka setlwaedi seo se dumelegago ka kakaretšo;
c iša ditatamente tšeo tša ditšhelete go Moswaradipuku Pharephare go senkwa le go Bamatlotlo a Profense, go ya ka ditlhalošo tša Molao wa Taolo ya Ditšhelete tša Setšhaba; le gore d mo dikgweding tše hlano tša mafelelo a ngwaga wa ditšhelete, e iše go Bamatlotlo a Profense le Molekgotlaphethiši ditatamente tša ditšhelete tšeo di hlahlobilwego go ngwaga woo ga mmogo le pego ya ngwaga ka ngwaga ka ga mediro ya Tlhohleletšo ya Kgwebo ya Gauteng GEP ya nakong ya ngwaga wa ditšhelete wo o hlalošwago ka go karolo ya 302.
Molekgotlaphethiši o swanetše go bega pego le ditatamente tša ditšhelete tšeo di hlalošwago ka go karolwana ya 1d ka go Lekgotlapeamelao ka pele ka mo go kgonegago.
Bamatlotlo a Profense ba ka laela gore ditatamente tša ditšhelete tšeo di hlahlobilwego tša Tlhohleletšo ya Kgwebo ya Gauteng GEP di kopantšhwe ka go ditatamente tša ditšhelete tša Kgoro.
Go bega
Mo matšatšing a 30 a mafelelo a kotara, goba lebaka le fe goba le fe leo le bewago ke Molekgotlaphethiši nako le nako, Tlhohleletšo ya Kgwebo ya Gauteng GEP e swanetše, go bega ka Lekgotla go Molekgotlaphethiši ka ga tiragatšo ya yona ya leano la maanotshepetšo mo kotareng yeo.
Mo dikgweding tše tharo tša mafelelo a ngwaga wo mongwe le wo mongwe wa ditšhelete, Tlhohleletšo ya Kgwebo ya Gauteng GEP e swanetše go beakanya pego ya ngwaga ka ngwaga ka ga mediro ya yona mo ngwageng woo.
Tlhohleletšo ya Kgwebo ya Gauteng GEP e swanetše go fa Molekgotlaphethiši dipego tše dingwe di fe goba di fe tšeo Molekgotlaphethiši a ka di kgopelago.
Pego ya ngwaga ka ngwaga e swanetše go akaretša tshenkoleswa, yeo e bitšwago Tshenkoleswa ya Ngwaga ka Ngwaga ya Dikgwebo tše Nnyane, yeo e swanetšego go akaretša merero yeo e laelwago ke Molekgotlaphethiši goba Hlogo ya Kgoro, mme e swanetše go akaretša –
a dintlha tša mošomo wo o diragatšwago ke Tlhohleletšo ya Kgwebo ya Gauteng GEP le kgatelopele yeo e fihleletšwego go tšwetša pele ditebanyo tša Maanotshepetšo a Bosetšhaba a Thekgo ya Dikgwebo tše Nnyane;
b kakaretšo ya diphihlelo goba ditšhišinyo mabapi le molaotlhakwa, molaotlhakwa wo o šišintšwego le tshepetšo ya taolo yeo e šitišago lefapha la dikgwebo tše nnyane;
c seswantšho sa ditšweletšo le mekgwa mabapi le lefapha la dikgwebo tše nnyane ka mono Profenseng;
d dipego ka ga kgolo le phokolo ya dikgwebo tše nnyane go ya ka lefapha, bogolo le retšene; le e tshekaseko ya dipalopalo tša seabe sa lefapha la dikgwebo tše nnyane ka go ekonomi, go kgodišo ya thomelontle, tšweletšo ya dinagamagae le go maemo a kakaretšo ya dihlopha tšeo di phaetšwego ka thoko ka go ekonomi.
KGAOLO 6
Molekgotlaphethiši a ka re, ka tsebišo ka go Kasete ya Profense, a kwalakwatša ditselatlhahlo gore ditho tša mmušo ka go profense le selegae di godiše tšweletšo ya kgwebo.
Ditselatlhahlo tšeo di hlalošwago ka go karolwana ya 1 di ka akaretša ditselatlhahlo ka ga –
a mekgwatshepetšo ya kgokagano le Kgoro ka ga melaotlhakwa ka moka yeo e šišintšwego yeo e beilwego ke Molekgotlaphethiši ka tlase ga karolwana ya 3;
b tshekatsheko ya ditlamorago le khuetšo ya molaotlhakwa wa dikgwebo tše nnyane;
c tshepetšo magareng ga ditho tša mmušo go godiša tšweletšo yeo e swarelelago ya dikgwebo tše nnyane;
d ditselatshepetšo tša kgokagano le mekgatlo ya dikgwebo tše nnyane, mekgatlo ya tša kgwebo le mekgatlo ye mengwe ya boemedi; le e tshenkoleswa ya molaotlhakwa wo o lego gona ga bjale ka ga tšweletšo ya tshwarelelo ya dikgwebo tše nnyane ka mono Profenseng.
Melawana le phetolo ya Šetulo
Molekgotlaphethiši a ka dira melawana mabapi le –
a dinyakwa goba ditselatshetšo tša go thwala maloko a Lekgotla le morero o fe goba o fe wo o lego mabapi le tšhomo ya Lekgotla;
b tlhamo le tiragatšo ya mananeo a thekgo ya ditšhelete tša dikgwebo tše nnyane go –
i kgontšha phihlelelo ya tšhelete ya dikgwebo tše nnyane; le ii go kgontšha phihlelelo ya tšhelete ke baabi ba ditirelo go dikgwebo tše nnyane;
c mokgwa wo ka wona dihlongwa di ka akaretšwago ka go Tlhohleletšo ya Kgwebo ya Gauteng GEP.goba morero o fe goba o fe wo o lego mabapi le kakaretšo yeo;
d tselatshepetšo ya go dira kgopelo ya thušo ya ditšhelete goba yeo e sego ya ditšhelete le morero o fe goba o fe wo o lego mabapi le kgopelo yeo; le e morero o fe goba o fe wo o ka hlokagalago goba wo o ka šomegago go hlaloša tiragatšo ya maleba goba taolotshepetšo ya Molao wo.
Molekgotlaphethiši a ka re, gore a fihlelele ditebanyo tša Molao wo, ka tsebišo ka go Kasete ya Profense a fetola Lenaneotshepetšo go hlaloša maikarabelo a tlhahlogo ya theko, diphetogo tše kgolo tša ekonomi le morero o fe goba o fe wo o huetšago dikgwebo tše nnyane.
Dihlongwa tšeo di kgethilwego
Molekgotlaphethiši a ka re, ka tsebišo ka go Kasete ya Profense morago ga go ikopanya le Lekgotla, a kgetha dihlongwa tšeo ditebanyo tša tšona di swanago le tša Tlhohleletšo ya Kgwebo ya Gauteng GEP.gore di tsenywe ka go Tlhohleletšo ya Kgwebo ya Gauteng GEP., go tloga letšatšing leo le beilwego ka go tsebišo.
Mo sehlongwa seo se hlalošwago ke karolwana ya 1 se lego ka tlase ga taolo ya bolaodiphethiši ntle le Molekgotlaphethiši, Molekgotlaphethiši a ka diragatša ka tšhomišano le bolaodiphethiši bjoo.
Molekgotlaphethiši o swanetše, ka baditaba le ka tsebišo ka go Kasete ya Profense, go kwalakwatša maikemišetšo a gagwe a go kgetha sehlongwa seo se hlalošwago ka go karolwana ya 1 mme a meme, gape a ele hloko, ditshwaetšo tša setšhaba.
Morago ga kakaretšo ya sehlongwa seo se kgethilwego go ya ka karolwana ya 1 –
a s sengwe le se sengwe seo se diragatšwago legatong la sehlongwa se tšewa gore se diragatšwa ke Tlhohleletšo ya Kgwebo ya Gauteng GEP; le b dithoto, ditshenyegelo, ditokelo le maswanedi a sehlongwa seo se kgethilwego, go akaretšwa le tekatekano ya kabelo, ditumelelo, kabelanyo le ditšhelete tše dingwe tšeo di tsentšwego, tšeo di lego gona goba di šomišitšwe mabapi le tšwetšopele ya ditebanyo le mešomo ya sehlongwa, di fetetšwa go Tlhohleletšo ya Kgwebo ya Gauteng GEP.
Motho yo a thwetšwego ke sehlongwa seo se kgethilwego go ya ka karolwana ya 1 o swanetše go fetetšwa ka go Tlhohleletšo ya Kgwebo ya Gauteng GEP go tloga ka letšatši leo le beilwego go ya ka–
a karolo ya 197 ya Molao wa Tshepetšo ya tša Mešomo Labour Relations Act, 66 of 1995; le b kwano e fe goba e fe ya seboka bjalo ka ge go hlalošwa ka go karolo ya 213 ya ya Molao wa Dikamano tša Mešomo, 66 wa 1995 Labour Relations Act, 66 of 1995;
Mo mabakeng a Molao wa Motšhelo wa Letseno wa 58 wa 1962 Income Tax Act, 58 of 1962, ga go na phetolo ya mongmošomo yeo e tlago tšewa bjalo ka ge e diregile ge motho yo a hlalošwago ka go karolwana ya 5 a thoma mošomo ka go Tlhohleletšo ya Kgwebo ya Gauteng GEP.
Ka pele ka mo go kgonegago, morago ga kakaretšo yasehlongwa go ya ka karolwana ya 1 –
a Molekgotlaphethiši, goba bolaodiphethiši bja sehlongwa seo se kgethilwego, o swanetše go tšea magato ka moka ao a swanetšego go fediša sehlongwa; mme b Mongwadiši wa Dikhamphani, Masetara wa Kgorotshekokgolo goba setho se fe goba se fe se sengwe sa bookamedi bja taolotshepetšo ba swanetše go tšea magato ao a swanetšego go phumula ngwadišo ya sehlongwa.
KGAOLO 7
DITLHALOŠO TŠA KAKARETŠO
Motho a ka se —
a sepetše kgwebo e fe goba e fe, mošomo goba kgwebišano goba a ngwadišwa goba a fiwa laesense ka tlase ga molao o fe goba o fe ka tlase ga leina leo le nago le mantšu a "Tlhohleletšo ya Kgwebo ya Gauteng", lentšukopafatšwa la "GEP" goba phetolelo ya mantšu ao ka go polelo e fe goba e fe ya semmušo; goba b a šomiša bofora gore o šoma legatong la, Tlhohleletšo ya Kgwebo ya Gauteng GEP.
Motho o fe goba o fe yo a tlolago karolwana ya 1 o tla bewa molato mme a ka golegwa mme a lefišwa goba a romelwa kgolegong ya lebaka leo le sa fetego mengwaga ye mehlano goba a ka otlwa ka tefišo le kgolego ka bobedi bja tšona.
Sephiri
Motho o fe goba o fe yo a ka utollago tshedimošo e fe goba e fe yeo a e hweditšego ge a diragatša mošomo go ya ka Molao wo o oba molato.
Karolwana ya 1 ga e diragatšwe ge e le gore tshedimošo –
a e be e šetše e tsebagala setšhabeng;
b e utolotšwe go kgontšha motho gore a diragatše mošomo go ya ka Molao wo; le c gore e utolotšwe go ya ka Molao wo, molao o fe goba o fe wo mongwe goba taelo ya kgorotsheko.
Tlolo e fe goba e fe ya karolwana ya 1 e hlola maitshwarompe mme ge e le gore motho yo a e tlolago ke -
a leloko la Lekgotla, le ka šongwa go ya ka karolo ya 83; le b mošomi, o swanetše go lebagana le magato a kgalemo, go akaretšwa le go kgaolwa mošomong go ya ka ditselatshepetšo tša kalemo tša Tlhohleletšo ya Kgwebo ya Gauteng GEP.
Ditlhagišo tša nakwana
Mo mabakeng a karolo ye, e fela go e ya ka Molao wo, "tša Tlhohleletšo ya Kgwebo ya Gauteng", khamphani yeo e akareditšwego ka tlase ga karolo ya 21 ya Molao wa Dikhamphani, 61 wa 1973, le nomoro ya ngwadišo ya 2004/031868/08 e swanetše go ba Tlhohleletšo ya Kgwebo ya Gauteng GEP bjalo ka ge go hlalošitšwe ka go karolo ya 2 wa Molao wo.
Lekgotla la "Tlhohleletšo ya Kgwebo ya Gauteng" leo le akareditšwego ka tlase ga karolo ya 21 ya Molao wa Dikhamphani, 1973 le swanetše go ba Lekgotla leo le hlalošwago ka go karolo ya 7 ya Molao wo mme le šoma mo karolong ya lebaka leo le sa fetwago ke nako yeo le thwaletšwego yona ke Molekgotlaphethiši pele ga go tsenywa tirišong ga Molao wo.
Molekgotlaphethiši o swanetše go tšea magato ka moka ao a swanetšego go netefatša gore Tlhohleletšo ya Kgwebo ya Gauteng e emiša go ba khamphani yeo e akaretšwago ka tlase ga karolo ya 21 ya Molao wa Dikhamphani, 61 wa 1973 mme e ngwetšwe bjalo ka setho Profense sa setšhaba seo se hlalošwago ka go karolo ya 31 ya Molao wo.
) Mo dikgweding tše tshelelago tša tsenyo tirišong ya Molao wo, Lefelo la Keletšo ya tša Tlhamotšweletšo la Gauteng (Manufacturing Advisory Centre (GAUMAC) le swanetše go šwalalana go ya ka molaotlhakwa wo o dirišwago, mme dithoto tša lona di fetetšwe go Tlhohleletšo ya Kgwebo ya Gauteng (GEP).
Lefoko le le kopana le tsenyotirišong
Molao wo o bitšwa Molao wa Tlhohleletšo ya Kgwebo ya Gauteng, 2005 (Enterprise Propeller Act, 2005,) mme o tsenywa tirišong mo letšatšing leo le beilwego ke Tona ka tsebagatšo ka go Kasete ya Profense.
LENANEOTSHEPETŠO
Lebelela tlhalošo ya " dikgwebo tše nnyane" ka go karolo ya 1
Sekgao sa 1
Sekgao sa 2
Sekgao sa 3
Sekgao sa 4
Sekgao sa 5
Lefapha goba lefaphana go ya ka Maemo a Magoro a Intaseteri
Bogolo bja legoro
Palomoka ya nako yeo e tletšego ya tekatekano ya bašomi bao ba lefelwago
Palomoka ya poelo
Palomoka ya ka godimo boleng bja dithoto (dithoto tšeo di sa šuthego di sa akaretšwe)
Temo
Magareng
Nnyane
Nnyane kudu
Meepo le Kepo
Magareng
Nnyane
Nnyane kudu
Magareng
Nnyane
Nnyane kudu
Mohlagase, Kgase le meetse
Magareng
Nnyane
Nnyane kudu
Kago
Magareng
Nnyane
Nnyane kudu
Thekišo le Kgwebo ya Mebotoro le Ditirelo tša Tokišo
Magareng
Nnyane
Nnyane kudu
Magareng
Nnyane
Nnyane kudu
Dijo, Marobalo le Dikgwebo tše dingwe
Magareng
Nnyane
Nnyane kudu
Polokelo le Dikgokagano
Magareng
Nnyane
Nnyane kudu
Ditšhelete le Ditirelo tša Kgwebo
Magareng
Nnyane
Nnyane kudu
Setšhaba, Leago le Ditirelo tša Batho
Magareng
Nnyane
Nnyane kudu
